من نحن

 

– احنا مين ؟!

احنا كيان ناشئ مُكون من عدة شباب عندهم شغف بالـ Fashion والـ Style واللبس بشكل عام ، لما دورنا في السوق علي حد بيفيد الناس والمجتمع عموماً في موضوع اللبس ملقناش فيه إفادة حقيقية كاملة بل لقينا ان كله عايز يبيع وبس ، كله بيعرض البضاعة اللي عنده والهدف الأول والأساسي عنده تتباع مش مهم تتباع لمين ، مش مهم هتناسبك ولا لاء ، مش مهم حاجات كتير أوي…

مش معني كده ان ده غلط ، ولكن في نفس الوقت مش ده الأكتر فايده للجمهور والمجتمع ، السبب الأول والأخير للملابس من وجهه نظرنا ان يكون مظهرك كويس وبيعبر عن شخصيتك والستر طبعاً 😂 ، أكيد مش هتلبس حاجة وانت عارف انها مش مناسبة ليك ، وبالتالي حبينا نعرف علي أي اساس الناس بتختار لبسها ولكن للأسف بعد بحث طويل وعميق اكتشفنا ان مفيش أسُس واضحة الواحد بيختار علي أساسها وبالتالي مش بيقدر يحقق الهدف اللي بيلبس عشانه لأن للأسف مفيش هدف أصلاً.

احنا مش خبراء محترفين بالموضة أو مصممين أزياء ، إحنا مجرد شباب ولكن عندنا شغف بفكرة البساطة ، وعشان كده اسمنا S – Clothing وحرف الـ S هنا اختصاراً لكلمة Simple وشعارنا هو Keep it simple ، وهنا تبدأ كل حاجة تبقي واضحة أن اساس الشياكة والأناقة في المظهر واللبس هو ” البساطة ” ، الموضوع بسيط لدرجة ان ناس كتير ممكن متكنش بتاخد بالها منه.

فقررنا بكل بساطة ووضوح اننا نعمل مجتمع مهتم بأنه يلبس صح بهدف واضح من اللبس وهو انه يكون مظهره كويس وشيك وبدون تكلفة مادية عالية في نفس الوقت لأن ” عمر ما كان اللبس بالفلوس الكتير “.

خليك حاطط في دماغك ان لبسك بيعبر عن شخصيتك وزي ما انت بتطور كل جانب في جوانب حياتك ، لازم تطور من شخصيتك دايماً وتكون نسخة افضل من نفسك طول الوقت.

مش هنطول عليكم اكتر من كده ، احنا بدأنا بيكم ومكملين بيكم ومعاكم وهتشوفوا محتوي يليق بيكم دايماً ، وهنتناقش في أي اهتمامات او مواضيع حابين نتكلم فيها بخصوص اللبس والاستايل ولو حد حابب يراسلنا او يستفسر عن اي حاجة في أي وقت احنا في الخدمة دايماً.

زر الذهاب إلى الأعلى
إغلاق