أناقةنصائح وإرشادات
أخر الأخبار

لو لبست شوال هتلاقيه شغال

لو لبست شوال هتلاقيه شغال

” لو لبست شوال هتلاقيه شغال ”

جملة عادية اتقالت ادامي لواحد صحبي بس مديتهاش اي اهتمام ولا خدت بالي منها نهائي في وقتها ، ولكن فضلت فترة كبيرة جوه عقلي .. وعرفت قيمتها مع الوقت.

صاحبنا اللي اتقالتله الجملة دي مكنش موديل ولا عينه خضراء ولا دقنه لحد بطنه ولا الهري ده كله … كل اللي كان فيه انه كان عامل فورمه وجسمه حلو، متناسق مع بعضه .. كده بس ! ايوه كده بس!! 😅😂

– لما بتشوف صور موديل او ناس ستايلها عاجبك ونفسك تبقي زي حد فيهم وتتخيل نفسك زيهم، تلاقي صوت بيرد عليك وبيقولك لاء ياعم الناس دي فين وانت فين انت هتصدق نفسك ولا ايه ! الصوت ده ممكن يكون واحد صاحبك او صحبتك او حد من قرايبك او صوتك الداخلي كمان وللاسف ناس كتير مصدقه الصوت ده.. وللاسف تاني انت لو صدقت الصوت ده عمرك ما هتتغير للاحسن نهائي.

– طب ازاي اقدر انسف الأصوات دي ؟!

عشان تنسف الاصوات دي من حواليك، وتقدر توصل تبقي زي الناس اللي في الصور دي اللي انت متقلش عنهم في شئ نهائي بالعكس ممكن تكون احسن منهم بكتير.

اول خطوة هي انك ابدأ اهتم بجسمك ثم جسمك ثم جسمك .. وجسمك هنا معناها صحتك الجسدية واكلك وتمرينك وانك تبطل اي حاجة بتضرك وبتخليك في وضع غير الطبيعي، لان الطبيعي اننا نكون كلنا في صحة كويسة وجسم متناسق وكويس مش شرط يكون مثالي اكيد.

ولكن للاسف افعالنا بتخلي النتيجة تكون عكس الطبيعي بدون وعي مننا وبسبب سرعة وزحمة الدنيا من حوالينا وعدم التركيز مع الجانب الصحي والجسماني ومع الوقت احنا بنتعود علي ده وبيكون صعب انك تغير سلوكك للأفضل من تاني!

مثال : ممكن تجيب قميص من براند كبير بـ 800 جنيه ويكون حلو جدا بس لما تلبسه ميكونش حلو عليك بسبب ان جسمك رفيع جدا او مليان زيادة عن اللزوم، في حين انك لو وفرت من فلوس القميص ده 500 جنيه ونزلت بيهم چيم وصرفتهم علي صحتك واكلك وظبطت جسمك واشتريت قميص بـ 300 جنيه بس ، هيكون احلي من القميص اللي كنت هتشتريه من براند كبير بـ 800 جنيه، التغيير اللي حصل هنا انك انت اتغيريت جسمانياً وهيئتك اختلفت فبالتالي النتيجة هتختلف تماماً.

الخلاصة : خلي جسمك وصحتك في المرتبة الأولي وستايلك ولبسك في المرتبة التانية وهتشوف فرق عمركشوفته قبل كده وثقتك بنفسك هتزيد بشكل غير طبيعي و٩٠% من الهدوم هتليق عليك اكتر من الاول ومش هتحتاج تشتري هدوم غالية اوي عشان يبقي شكلك احسن من الاول بالعكس هتوفر كتير كمان عن الاول 🔥🖤

وساعتها بس هتكتشف انك فعلاً ” لو لبست شوال هتلاقيه شغال ” وهتحس عُمق الجملة دي 🔥

اخر حاجة : احنا مش بنتنمر علي حد او بنقول انك جسمك وحش كده سواء كنت رفيع اوي او مليان شوية ، ده مش قصدنا نهائي ولكن خلي عندك فكرة انك عايز دايماً تطور نفسك للاحسن ف كل جوانب حياتك وبالذات الجانب الصحي 

ولو حد عنده تجربة في الموضوع ده يشاركنا في الكومنتات 💥🔥

الوسوم
اظهر المزيد
زر الذهاب إلى الأعلى
إغلاق